1 Star2 Stars3 Stars4 Stars5 Stars (2 votes, average: 1,50 out of 5)
Загрузка...
893 views

Дьоруой Ийэ Неустроева М.Х. 90 сааһа

Неустроева Матрена Харитоновна 1933 сыллаахха сэтинньи 10 күнүгэр Таатта Игидэйигэр төрөөбүтэ. Ийэтэ Кузьмина Анастасия Тихоновна, аҕата Матаннанов Харитон Петрович.  Биэс бииргэ төрөөбүттэртэн иккис оҕонон  күн сирин көрбүтэ. 1949 сыллаахха 7 кылааһы ситиһиилээхтик бүтэрэн, Дьокуускайдааҕы педагогическай училищеҕа дошкольнай отделенияҕа үөрэммитэ.

1953 с.  « Эдэр коммунист» хаһыат редакциятыгар биллиилээх журналист, биир дойдулааҕа И.А. Аргунов  сүбэтинэн корректорынан үлэлиир. 1955 с. Дьокуускай куораттааҕы комсомол горкома ыччакка анаан Ыҥырыы таһаарбыта. Онно эдэр ыччаты куорат тутуутугар активнайдык кытталларыгар ыҥырбыта. Бу ыҥырыыны истээт  Каменщик идэтин толору баһылаан эр дьону кытта соҕотох кыыс кыһыннары- сайыннары тэбис тэҥҥэ 5 сыл үлэлээбит.

                1956 сыллаахха кулун тутарга Москваҕа Бүтүн Россиятааҕы тутааччылар сүбэ мунньахтарыгар кыттыыны  ылбыта умнуллубат түгэни хаалларбыта. Онно « Якутстрой » начальнига Жорницкай Ефим Львович, СМУ-1 управляющайа Старовойтов Григорий Денисович , СМУ-1 болуотунньуга Торохов Николай буолан сылдьыбыттара. Комсомол Киин комитетын Бочуотунай грамотатынан наҕараадаламмыта.

          Уолбаттан төрүттээх Неустроев Василий Сидоровиһы көрсөн ыал буолан  олохторун холбууллар. Матрена Харитоновна дойдутугар тахсан 1961-1964 сылга диэри Дэбдиргэҕэ дьааһыла саадка сэбиэдиссэйинэн үлэлээбитэ. Уус Тааттаҕа «Хатыҥчаан» оҕо саадыгар сэттэ сыл рабочайынан үлэлээбитэ.

1964 сылтан Уус Тааттаҕа көһөн дьиэ-уот туттан олохсуйбуттара. 10 оҕону төрөтөллөр. 1972 с Герой Ийэ үрдүк аата иҥэриллибитэ. Кэргэнэ  эрдэ өлөн, аҥардас хаалан баран 10 бэйэтин оҕотун таһынан 5 балтыларын, бырааттарын, биир сиэнин кыра саастарыттан ылан соҕотоҕун ииппитэ, сиэнин Нарыйаны төрүөҕүттэн бэйтэ көрөн- истэн улаатыннартаабыт

1979 сылтан П.Алексеев аатынан совхозка доярканан тылланан тахсан үлэлээбитэ. Совхозка үлэлиир кэмигэр ынах ыаһыныгар бастакынан биир ынахтан 2000-лаах кирбиини ылан, онтон икки сыл субуруччу 3000-лаах кирбиилэри ылаттаан оройуонун 3 төгүллээх социалистическай күрэхтэһии кыайыылааҕа чемпион ыанньыксыта. Петр Алексеев аатынан бириэмийэ 3 төгүллээх лауреата.  «Оскуола-производство-үрдүк үөрэх » девиһинэн тахсар оҕолору кыһыннары-сайыннары бэйэтин кытта илдьэ сылдьан үлэҕэ уһуйбута. П.Алексеев совхозка доярканан ыччат наставнигынан үлэлээбитэ.

Алдан нэһилиэгин Бочуоттаах олохтооҕо, Таатта улууһун бочуоттаах олохтооҕо, Дьоруой ийэ, үлэ тыыл уонна СӨ Тыатын хаһаайыстыбатын бэтэрээнэ, Петр Алексеев аатынан оройуон 3 төгүллээх чөмпүйүөн- ыанньыксыта, бааһынай хаһаайыстыба бастыҥ салайааччыта, толору ыал ийэтэ, эйэҕэс эбэтэ, хос эбэтэ.

1991 сылтан   «Эмис » бааһынай хаһаайыстыба тэринэн сайылык туттан, сүөһү сылгы, сибиинньэ, коза, куурусса иитэн бастыҥ үлэлээх хаһаайыстыба салайааччытынан үлэлээбитэ. Билигин Дьокуускай куоракка сиэнин кытары олорор. Күһүн саас уолугар Коляҕа Уус Тааттаҕа кэлэн дойдутугар олорон сынньанар. Сайынын  “Сэбирийэ” диэн сайылыгар хас сайын аайы сайылыыр .

Добавить комментарий

Ваш адрес email не будет опубликован. Обязательные поля помечены *