![]() |
Саҥа 2025 сылынан Алдан нэһилиэгин аҕам саастаахтарыгар «Ретро- Сэбиэскэй кэминээҕи саҥа дьыл» бырааһынньык тохсунньу 9 күнүгэр кулуупка ыытылынна. «Оҕо сааспыт харыйатын» үтүө өйдөбүл гынан ууран оҕо саастарын киэргэлин оонньуурдарыттан өҥнөөх кумааҕынан сыапачкары оҥорон илдьэ кэлэн, күндү таас оонньуурдарын, гирлянданы, кылапачыгас мөһүүрэлэринэн харыйабытын киэргэттибит. Эдэр саастарын харыйа оонньуурдарын Татьяна Николаевна Канаева, Антонина Николаевна Неустроева, Анна Николаевна Собакина сиһилии кэпсээтилэр.
Быыстапкаҕа «Ретро-сэбиэскэй кэминээҕи муода» танастарын хопполоруттан хостоон аҕалан туруордулар. Муодаҕа кыттааччыларбыт биир -биир сценаҕа тахсан 18 үйэтээҕи , 70, 50 сыллааҕыта кэтиллибит таҥастар историяларын иһиттибит, кэпсээбиттэрин сэҥээрэн көрдүбүт. Ольга Капитоновна Винокурова 18 үйэҕэ хос эбэтин былаатын эбэтэ кэриэстээн бэлэхтээбитин уура сылдьыбытын аҕалан көрдөрөн сөхтөрдө. Антонина Николаевна Неустроева биэс сааһыгар ийэтэ тигэн кэтэппит, онус кылааһы бүтэрэригэр банкекка кэппит ,крепдешин, ийэтэ кэриэстээн уура сылдьыбыт былааччыйаларын, түүппүлэтин онтон да араас элбэх таҥастары көрдөрдө. Ульяна Егоровна оҕо саадыгар үлэлии сылдьан бэйэтэ тикпит сиидэс былааччыйатын аҕалан кэпсээтэ. Онтон бары кыттааччылар сценаҕа туруоруллубут быыстапкаттан сөп түбэспит таҥастарын кэтэн хааман барыбытын үөртүлэр. Маны таһынан Антонина Николаевна бэйэтин коллекциятыттан сэбиэскэй кэминээҕи саҥа дьыллааҕы аккырыыккаларын альбомҥа мунньубутун аҕалан быыстапкалаан көрдөрдө. Антонина Николаевнаҕа уонна саамай саастаах эдэр эрдэҕиттэн өрүү көхтөөх кыттааччыга Ульяна Егоровнаҕа бириистэр туттарылыннылар.Бырааһынньыкка кэлбит пенсионердар бэйэ бэйэбитигэр бэлэх туттарыстыбыт. Сүүйүүлээх лотереяҕа кириэһилэ хачыалы Татьяна Николаевна, сахарнай вата оҥорор аппарат супер бириистэри Клавдия Николаевна сүүйэн үөрдүлэр-көттүлэр. Саҥа дьыллааҕы бырааһынньыкпытын бэрткэ кэпсэтэн, ыллаан — туойан, үҥкүүлээн, сынньанан тарҕастыбыт. Маны таһынан быйыл сайын от ыйыгар ыытыллар Манчаары оонньууларыгар анаан тикпит олбохпутун быыстапкалаан хаартыскаҕа түстүбүт.
Барыгытын үүммүт Саҥа Сылынан эҕэрдэлээн туран инникитин буолар бырааһынньыктарга көхтөөхтүк кыттаргытыгар ыҥырабыт. Дьиэ кэргэҥҥитигэр нус- хас олоҕу, кытаанах доруобуйаны, этэҥҥэ буолууну баҕарабыт.
![]() |
![]() |
![]() |
![]() |
![]() |
![]() |
![]() |
![]() |
![]() |
![]() |
![]() |
![]() |
![]() |
![]() |
![]() |
![]() |