Загрузка...Кулун тутар 14 күнүгэр «Кытыл» норуот айымньытын дьиэтигэр Ньурба судаарыстыбаннай көһө сылдьар тыйаатыра Алдан нэһилиэгэр ыалдьыттаата. Артыыстар калмык суруйуааччыта Алексей Балакаев «Ийэ сүрэҕэ» айымньытын оонньоон көрдөрдүлэр. Тыаһа- ууһа, уота — күөһэ артыыстар оонньууларын биир тыынынан көрдүбүт. Артыыстар бэйэлэрин оруолларын толору арыйдылар, испэктээкили үрдүк таһымҥа көрдөрдүлэр. Ийэ барахсан сүрэҕэ — оҕоҕо. Бу дирин өйдөбүллээх оруолу Сардаана Михайлова — култуура туйгуна наһаа үчүгэйдик оҕотун туһугар долгуйуутун сүрдээх итэҕэллээхтик толордо. Кини уолун Пүрбээ оруолун биир дойдулаахпыт Ытык Күөлтэн сылдьар артыыс Никита Григорьев толордо. Никита 2022 сыллаахха Арктикатааҕы култуура уонна искуустуба институтун бүтэрбит. Оскуолаҕа үөрэнэ сылдьан «Доҕордоһуу» оҕо- үнкүү норуодунай ансаамбылыгар дьарыктаммыт. Үҥкүүлүүрэ имигэһэ, тыла — өһө чуолкайа, көрөрө- истэрэ , айылҕаттан талааннаах артыыспыт Ньурба театрыгар таһаарыылаахтык үлэлии сылдьарыттан үөрдүбүт, астынныбыт. Онтон Саарка оруолун толорбут Надежда Афанасьева Саха Өрөспүүбүлүкэтин култууратын туйгуна олус талааннаах артыыска буолара көстөр. Омсолоох дьоруой да буоллар көрөөччүнү бэйэтигэр умсугутта. Эчи туттара , куолаһын уларытара үчүгэйин. Саарка чаҕардара Пүрбээни кэлэн ылыыларыгар хамсаныылара олус тыҥааһыннаах. Миндьээ оруолун Саха Өрөспүүбүлүкэтин үтүөлээх артыыһа Майя Слепцова «Уот Дьулустаан» дьон биһирэбилин ылбыт сериалга Ньукууну ииппит эбээ Сүөкүлэни бары үөрэ көрдүбүт. Уобараһын кыайа-хото тутан оруолун арыйда.
Ньурба тыйаатырын артыыстара бары уһулуччу үчүгэйдик оонньоотулар. Испэктээкил кэнниттэн нэһилиэк олохтоохторо өйдөбүнньүк хаартыскаҕа түстүбүт.
https://rutube.ru/video/863c3898ed41747b1231987a86a67ce6/
https://rutube.ru/video/849873a9224e1fc73edf96ddac17d739/
https://rutube.ru/video/449f5ea3024b8d784996f77eb3268bf6/